انسان کی زندگی میں کبھی کبھی ایسا وقت آتا ہے
جب وہ جو کچھ بھی کر رہا ہوتا ہے وہ احساس سے بلکل عاری ہوتا ہے- نہ اس کو وقت
گزرنے کا احساس ہو رہا ہوتا ہے، جو کہ بڑی تیزی سے گذر رہا ہوتا ہے، اور نہ ہی
اپنے کام کا جس سے اتنا دل اچاٹ ہو جاتا ہے کہ احساس نام کی کوئی چیز نہیں رہ
جاتی۔ بس اس کا جسم ہوتا ہے جو ایک جگہ سے دوسری جگہ بغیر کچھ محسوس کیے چلتا رہتا
ہے۔ ٹانگیں ہوتی ہیں جو نہ جانے کیوں بلاوجہ حرکت کرتی رہتی ہیں-
جب زندگی میں کسی چیز کا جذبہ نہیں رہتا، مقصد
نہیں رہتا تو پھر ایسا ہوتا ہے - بغیر مقصد کے زندگی ایسے ہی ہے جیسے بغیر روح کے
جسم – مقصد ہوتا ہے تو انسان کی زندگی میں اک جذبہ ہوتا ہے جو اس کی روح کو تسکین
دیتا ہے اور اس کے جسم کو اک نئی قوت۔
ہم
زندگی میں بہت سے مقصد بناتے ہیں مگر پھر ان منزلوں تک پہنچتے پہنچتے کہیں رستوں
میں ہی بھٹک جاتے ہیں کیوں کے وہ مقصد کبھی ہمارے تھے ہی نہیں – ہم دوسروں کو دیکھ
کر اپنی منزلیں چنتے ہیں ہم اپنے اندر کی آواز سن کر منزل نہیں چنتے۔ ہم سوچتے ہیں
کی ہماری منزلوں کو دیکھ کر لوگ پتہ نہیں کیا کہیں گے۔ ہم اپنے آپ کو دوسروں سے
کمتر سمجھنا شروع کر دیتے ہیں۔ اور ہم اپنے اندر کی آواز کو وہیں دفن کر دیتے ہیں
اور پھر ساری زندگی افسوس کرتے گزارتے رہتے ہیں۔ پھر ایسے مواقع بھی آتے ہیں جب
انسان پھر سے اپنی منزل کی طرف لوٹنے کی سوچتا ہے لیکن پھر وہ یہ سوچ کر کے اب تو
میں بہت آگے آگیا ہوں اپنی آواز کو دبا دیتا ہے اور یونہی گھٹ گھٹ کر زندگی گزارتا
چلا جاتا ہے –
اگر ہم اس طرح زندگی نہیں گزار سکتے جس طرح
ہمارا من کہتا ہے ، جس سے ہماری روح کو تسکیں پہنچتی ہے اور اک نیا ولولہ پیدا
ہوتا ہے تو پھر یہ سب کچھ اک اداکاری ہے
آپ جتنے اچھے اداکار بن جاتے ہو اتنا زیادہ ہی آپ دوسروں کی نظروں میں ایک خوش باش
اور اچھا انسان بن سکتے ہو مگر اندر ہی اندر سے مرتے چلے جاتے ہو وہ الگ بات ہے
اگر آپ ب حسی میں بھی آگے نکل گئے ہو۔
